MAGING MAALAM SA MGA MAPANLINLANG

 BASAHIN: 2 Pedro 2:12-19

“Bawal judgmental! Isa ito sa mga nauusong TV contests ngayon na ang player ay kailangang pumili ng mga tamang tao ayon sa ibinigay ng tanong. Ang hitsura ang basehan kaya hanggang ngayon ay wala pang nakaka-perfect score. Ang panlabas na anyo ay nakapanlilinlang. At kung hindi tayo magiging maingat, malamang nadaya na tayo, hindi pa natin nalalaman. Ang talatang pagbubulay-bulayan natin ngayon ay straightforward exposure ng mga taong mapanlinlang.”

Babala! “Bawal tumawid, Nakamamatay!” Marami tayong nakikitang warning sign sa kalsada, subalit patuloy ang ilan sa pagsuway dito. Ang Biblia ay punung-puno ng mga babala, subalit may mga taong ayaw pa ring maniwala sa itinuturo nito. Ang mga talatang pinagbubulay-bulayan natin ngayon ay matinding babala ni Apostol Pedro sa mga sinusulatan niya – ang mga mananampalatayang nagkalat sa iba’t ibang bayan ng Asia Minor. Ang babala ay hindi na sa mga tao sa labas ng iglesia kundi sa mga taong nakapasok sa loob na ang layunin ay manlinlang. Kaya, kung ang paraan ng pagkakasulat ay diretsahang pagsasabi ng kanilang katangian, ito ay hindi para sila ay i-judge o husgahan, kundi upang ilantad ang ginagawa nilang panlilinlang.

Mga Mapanlinlang, ANG KANILANG KATANGIAN (basahin  ang t. 12-14). Mapandaya ang ginagawa nila. Parang mga hayop na walang isip, ang mga kilos ay ayon sa kanilang ‘animal instinct.’ Walang basehan at hindi naaayon sa tamang pangangatwiran. Sa halip na makagaan ay nagududulot ng kaguluhan at kabigatan ng kalooban. Mapandaya ang kanilang pagnanasa. Ang kahalayan ay nakatago sa salitang “kasiyahan.” Kaya kahit nakakahiya at nakasisira ng puri, bunga ng panlilinlang, basta masaya sila ay nakapapasok sa iglesia. Mapandaya ang hitsura nila. Ang mga mahihina at nagsisimula pa lamang sa pananampalataya ang kanilang target. Sa kanilang kasakiman, gagawin nila ang lahat, makuha lamang ang pinagnanasaang tao o bagay.

Mga Mapanlinlang, ANG KANILANG ISIPAN  (basahin ang t. 15-17). Lumihis sila. Iniwan nila at inabandona ang matuwid na landas kaya’t ang mga gawa nila ay nawalang kabuluhan. Itinulad sila kay Balaam na nagpabayad sa paggawa ng masama, hindi niya nakita ang kilos ng Diyos, kaya’t pinagsalita ng Diyos ang asno para siya ay sawayin. Ang mga mapanlinlang ay bulag sa katotohanan kaya’t umaakay sila patungo sa pagkahulog sa bangin. Para silang batis na walang tubig at ulap na itinataboy ng malakas na hangin. Walang saysay. Walang kabuluhan. Pawang kalaliman at kadiliman ang kanilang patutunguhan.

Mga Mapanlinlang, ANG KANILANG PANANALITA  (basahin ang t. 18-19). Mayayabang na pananalita, puro hangin ang dala. Mga salitang nagbubuhat ng sariling upuan at nagtataguyod ng kanyang kaharian. Walang saysay at walang kabuluhan. Gumagamit sila ng mga salitang mapang-akit upang maidamay ang iba sa liko nilang gawain. Sila ay alipin subalit nangangako ng kalayaan. Kaya’t may nahihikayat at naaakit sila patungo sa pagsunod sa kanilang panlilinlang.

Marami ang fake. Pati sa tao ay may fake. Sa ating paligid ay maraming fake at minsan, nakapasok na church ay hindi natin namamalayan. Ang paraan nila ay panlilinlang. Mapandaya ang katangian. Mapandaya ang sinasabi ng isipan. Mapandaya ang pananalita. Kaya dapat lang na sa pamilya natin, tayo ay maging kaalaman sa mga taong ang layuin ay manlinlang.

Pastor Jhun Lopez

_____________________________

Nakaraang blog: MAGING MATUWID SA GITNA NG MASAMANG KAPALIGIRAN