MAGING HANDA SA MGA HULING ARAW

 BASAHIN: 2 Pedro 3:1-7

“Ang Bibliang gamit natin sa pag-akay at pagtuturo tungo sa paglago sa pananampalataya ay siya ring Bibliang gamit ng mga taong ang layunin ay ilayo tayo sa liwanag ng nito. Mahalagang tayo ay may matibay na kaalaman sa Biblia. Tayo ay nasa mga huling araw na at naghihintay sa araw ng muling pagbabalik ng Panginoon. Mas higit nating kailangan ang panahon sa Kanyang Salita.”

 

Sa dalawang sulat ni Apostol Pedro, sinikap niyang gisingin ang malinis na isipan ng mga mananampalataya sa pamamagitan ng Kasulatan (t. 1-2). Ang Cristianong nagkalat sa iba’t ibang bayan ay pinasok na ng mga huwad na guro at mga taong mapanlinlang. Kung ang Salita ng Diyos ang instrumentong gamit ni Apostol Pedro sa pagbibigay babala at pagpapaalaala upang magising ang diwa ng mga mananampalataya, ang paraan at gawain naman ng mga huwad ay sirain ang autoridad at kredibilidad ng Banal na Kasulatan. Sa panahon nating tayo ay nasa mga huling araw na at naghihintay sa araw ng Panginoon, paano natin gagamitin ang Biblia?

MAGTIWALA SA IPINANGAKO NG SALITA (t. 3-4). Ang mga huwad na guro at mga taong mapanlinlang na maaaring nakapasok sa Iglesia, sa panahong isinulat ni Pedro ang kanyang ikalawang sulat, ay “mga taong namumuhay ayon sa sarili nilang pagnanasa” (t.3). Sa kawalan nila ng tiwala sa mga ipinangakong Salita ng mga propeta, ng Panginoong Jesus at magin ng mga apostol, pagtatawanan nila ang mga Cristiano. Pinasisinungalingan at hinahamak nila ang pangako ng muling pagparito ng Panginoong Jesus sa pagsasabing “Namatay na ang ating mga ninuno ngunit wala pa ring pagbabago buhat nang likhain ang mundong ito” (t. 4).

PAHALAGAHAN ANG KATOTOHANAN NG SALITA. (t. 5-6). “Sinasadyang hindi pahalagahan” ng mga huwad at mapanlinlang ang pagsasara ng kanilang isipan sa katotohanan. Isinasara nila ang kanilang mga mata at itinatanggi ang katotohanang nilikha ng Diyos ang langit at lupa sa pamamagitan ng Kanyang salita. Isinaysay ni Apostol Pedro ang nakaraan; ang paglikha ng lupa buhat sa tubig at kung paanong ginunaw ang daigdig sa panahon ng Malaking Baha. Nakasarado ang isip nila sa anumang katotohanang ng Salita ng Diyos.

UNAWAIN ANG KAPANGYARIHAN NG SALITA. (t. 7). Ang kapangyarihan ng Salita ng Diyos; pinananatili ang langit at lupa, pagdating ng Araw ng Paghuhukom at ang pagpaparusa sa masasama. Minsan nang nagunaw ang daigdig sa pamamagitan ng baha. Nangamatay ang masasama at tanging si Noe at ang kanyang pamilya ang naligtas. Sa kasalukuyan, pinananatili ang langit at lupa sa paparating na Araw ng Paghuhukom. Ang Salita ng Diyos ay nagbababala sa katiyakang huhukuman ang daigdig at parurusahan ang masasama.

 

 

Ang paraan ng mga huwad na guro at mga mapanlinlang ay magtanim ng maling pagtuturo tungkol sa Salita ng Diyos. Ilayo ang mga mananampalataya sa pagtitiwala sa mga pangako ng Diyos, na kanilang balewalain ang Biblia at mawalan sila ng paniniwala sa kapangyarihan nito. Tayo ay nasa mga huling araw na. Hinihintay na natin ang paparating. Subalit hindi natin nalalaman ang eksaktong pagdating ng Araw ng Paghuhukom. Tiyak ang pagpaparusa sa mga masasama. Ang Salita ng Diyos ang matibay nating sandata at masasandigan. Kaya nga, sa ating pamilya, dapat ay maging handa tayo sa araw na ito na ang Biblia ay pangunahin sa atin.

Pastor Jhun Lopez

_________________________________

Nakaraang blog: MAGING GISING ANG MALINIS NA ISIPAN