MAGING MATATAG SA KATOTOHANAN

 BASAHIN: 2 Pedro 1:12-21 

Sabihin, “Sa dami ng mga fake news ngayon, hindi na natin minsan matukoy ang totoong balita sa hindi. Lalo na sa social media, nagkalat ang mga forwarded messages na kahit hindi alam ang source ay isini-share. Maging ang Biblia na nagdadala ng Good News ay nagdudulot ng kalituhan sa marami dahil sa magkakaibang interpretasyon nito. Kaya sa panahon ngayon, dumagsa ang iba’t ibang grupo ng mga relihiyon, napakahalaga ng matatag na kaalaman sa katotohanan ng Banal na Kasulatan.”

        

        Nagpapatuloy si Apostol Pedro sa pagsulat ng kalakasan para sa mga mananampalatayang nakikipamayan sa mga bayan ng Asia Minor. Sa ikalawang sulat niya, siya ay nagbigay ng mga babala, mga paalaala at mga pangako mula sa Diyos. Ang pagbati niya ay mga words of encouragement. Sa nakaraang pag-aaral natin, pinasimulan niya ang pagpapaalaalang lalong maging masigasig sa paglilingkod ang mga kapatiran sa kabila ng mga trials and struggles na kanilang nararanasan sa ibang bayan. Ang sumunod na pagpapaalaala ay itinuon niya sa tinanggap na katotohanan ng mga mananampalataya.

Ang Katotohanan, ALAM NA NINYO (t. 12-15). “Ang katotohanang inyong tinanggap” (t.12) ay maaaring tingnang tumutukoy sa naunang sulat ni Apostol Pedro na tinanggap ng mga Cristianong sinusulatan niya. Subalit higit pa roon, ang katotohanang tinutukoy niya dito ay ang Salita ng Diyos – ang Magandang Balita ng Panginoon. Masidhi ang kanyang pagpapaalaala sapagkat kahit nalalaman niyang matatag na ang mga ito sa katotohanan, patuloy pa rin siyang magpapaalaala (t. 12). Alam niyang nalalapit na ang kanyang pagkamatay kaya sinabi niyang, “Minabuti kong sariwain ito.” At sa kahalagahan nito, gagawin niya ang lahat, maalaala lang nilang lagi ang  katotohanan.

Ang Katotohanan, IPINAHAYAG NAMIN (t. 16-18). Ayon sa mga ipinahayag ni Apostol Pedro at nang iba pang mga apostol, tungkol sa kapangyarihan at muling pagparito ng Panginoong Jesus, ipinaliwanag niyang hindi ito nakabatay sa mga alamat na katha lamang ng tao. Ang tinutukoy niyang alamat ay mga kwentong sumasalungat sa katotohahan ng Biblia dahil may mga katha din naman ang tao na sumusuporta sa mga aral ng Biblia. Pinatutunayan niya ang Katotohanan sapagkat siya ay saksi nang tanggapin ng Panginoong Jesus ang karangalan at kaluwalhatian. Narinig niya, kasama sina Juan at Santiago, “Ito ang minamahal kong Anak na lubos kong kinalulugdan” (t.17; cf. Mateo 17:5). Inaalaala niya ang karanasan ng pagsama sa kanya ng Panginoon sa bundok (maaaring ito ay bundok Tabor.)

Ang Katotohanan, PAG-UKULAN NINYO NG PANSIN (t. 19-21). Matibay ang paniniwala ni Apostol Pedro sa ipinahayag ng mga propeta (prophetic word) na tumutukoy sa lahat ng Kasulatan. Hindi lamang sa isinulat ng mga Propeta kundi ang Lumang Tipan na higit niyang pinagtitiwalaan kaysa narinig sa bundok. Ang Katotohanang dapat nilang pag-ukulan ng pansin ay tulad ng “isang ilaw sa kadiliman na tumatanglaw.” Ang pagsikat ng araw ng Panginoong Jesus sa Kanyang muling pagparito na Siyang bituin sa umaga na magliliwanag at mahahayag sa puso ng mga mananampalataya. Ang pagsasabing, “walang makapagbibigay ng sariling pagpapakahulugan” (t. 20) ay hindi nagsasabing hindi natin ito maaaaring bigyan ng kahulugan, sa halip ay sinasabi nitong ang pagpapakahulugan ng mga manunulat nito ay hindi sa kanilang sariling kaisipan at kalooban lamang. Na ang Katotohanan ay “galing sa Diyos at ipinahayag ng mga taong nasa ilalim ng kapangyarihan ng Espiritu Santo.”

Ang Biblia ang batayan natin sa katotohanan. Marahil may alam na tayo at tinanggap na natin ang mga aral nito. Subalit dapat tayong magpatuloy sa pagtuon at pag-uukol ng pansin sa pagpapahalaga ng mga aral at gabay nito. Maging metatag tayo sa katotohanan ng Biblia!

Pastor Jhun Lopez

_______________________

Nakaraang blog: MAGING MASIGASIG SA PAGLILINGKOD