MAGING MASIGASIG SA PAGLILINGKOD

 BASAHIN: 2 Pedro 1:1-11

Sabihin, “Sa movies, ang isa sa mga inaasahan sa mga kasunod na kabanata (sequel) ay mas magandang mga eksena. Ito rin marahil ang inaasahan sa ikalawang sulat ni Pedro sa mga Cristianong nakikipamayan sa mga bayan ng Asia Minor. Ang sulat na ito ay may malaking pagkakaiba sa naunang sulat. Ayon kay Charles Swindoll, isang writer theologian, ito ang ‘the most intense epistle’ sa New Testament. Layunin ni Pedro ang pagpapaala-ala (stir up); gisingin ang puso’t diwa ng mga sinusulatan niya at humakbang ang mga ito sa pagbabago (1:12 at 3:1). Ang sulat ay naglalaman ng mga paalaala, mga babala at mga pangako patungo sa pagiging masigasig ng mga mananampalataya.”

Ang ikalawang sulat ni Apostol Pedro ay nagpasimula sa pagtatatag ng confidence sa mga mambabasa, sa pagsasabing, “tulad namin” (as ours) at sa pagdalanging maranasan nila ang kagandahang-loob at kapayapaang (grace and peace) mula sa Diyos (t. 1-2). Sa layuning magpaalaala, nagbigay siya ng mga pamamaraan kung paanong magiging masigasig ang mga mananampalataya sa kanilang paglilingkod. Paano tayo magiging masigasig sa paglilingkod?

Una, masigasig na maglingkod, MAY KALOOB ANG PANGINOON (t. 3-4). Sa pamamagitan ng kapangyarihan ng Diyos, tinanggap ng bawat mananampalataya ang lahat ng bagay na makapagtuturo tungo sa pagiging maka-Diyos. Ang Salita ng Diyos ay punung-puno ng mga aral na aakay sa atin sa pamumuhay na matuwid. Dahil sa pagkakilala natin sa Panginoong Jesus nakabahagi tayo sa Kanyang kaluwalhatian at kadakilaan. Katulad ng liwanag ng ilaw ng Panginoong Jesus, bawat isa sa atin ay tinatawag na ilaw ng sanlibutan. Binigyan Niya tayo ng mga pangako upang makaiwas tayo sa masamang nasa ng sanlibutan. Ang mga pangakong ito ay kasunod ng mga utos na gabay natin sa paglayo sa masama at sa pamumuhay tulad ni Cristo. Magiging masigasig tayo sa paglilingkod kung nalalaman natin ang mga katotohanang ito. Ikalawa, masigasig na maglingkod, MAY KABULUHAN ANG PANANAMPALATAYA. Dahil sa kaloob ng Panginoon, sinabi ni Apostol Pedro ang daan patungo sa ganap na pag-ibig. Magkakasunod niyang binanggit ang mga katangiang magtatapos sa pag-ibig: kabutihan> kaalaman> pagpipigil sa sarili> katatagan> maka-Diyos> pagmamalasakit sa kapatid> pag-ibig. Mahalagang angkin natin ang mga katangiang nabanggit upang hindi mawalan ng kabuluhan at pakinabang ang ating pananampalataya. Hindi tayo parang mga bulag na nakalimot sa ginawang paglilinis ng ating mga kasalanan. Ito ang mga katangiang dapat nating pagsikapan nang sa gayon ay maging masigasig tayo sa paglilingkod. Ikatlo, masigasig na maglingkod, PATUNAY NG ATING PANANAMPALATAYA. Hindi lang basta maging masigasig, lalong maging masigasig! Kung masigasig na ngayon, dagdagan pa ang ginagawang kasipagan. Sapagkat ito ang patunay na tayo ay kabilang sa mga tinawag at pinili ng Diyos. Ito ang ebidensiya. Hindi kayang sukatin kung nasaan na tayo sa pananampalataya. Ang makatapos ng mga aralin o ng isang kurso ay hindi garantiya na tayo nga ay lumalago sa buhay Cristiano. Ang masigasig na paglilingkod ang nagpapatunay sa mga tao na tayo nga ay mananampalataya ng Panginoong Jesu-Cristo. Hindi tayo matitisod at tiyak ang pagpasok sa walang hanggang kaharian ng Panginoon.

Kung hinihimok tayong maging masigasig, ibig sabihin, maaari tayong manghina sa paglilingkod. Kaya naman may mga naglilingkod na parang pagod na at gusto nang mag-quit. Itinagubilin ito sa atin upang maging babala at paalaala kasama ang pangakong tayo ay “papapasukin sa walang hanggang kaharian ng ating Panginoon” (t. 11). Maging masigasig tayo sa paglilingkod!

Pastor Jhun Lopez

______________________________

Nakaraang blog: MAPAYAPANG PAGHIMLAY