PAG-ASANG DI NATITINAG, SA KATAPATAN NG DIYOS NAKALAGAK

“Magpakatatag tayo sa ating pag-asa

at huwag nang mag-alinlangan pa,

sapagkat ang nangako sa atin ay maaasahan.”

Hebreo 10:23

MAGPAKATATAG SA PAG-ASA. Isa sa mga mahirap gawin ay ang umasa. Ito ay pagsubok sa ating pananampalataya; kung ito ba’y matitinag o hindi.   Sapagkat habang tayo ay may pag-asa, hindi tayo matatangay ng anumang problema at hindi tayo maaakay sa mga hidwang pananampalataya. Ito rin ang nagpapatatag ng pag-ibig; kung tunay nga ba ito at dalisay. Hindi ba’t ang laging tanong ng isang umiibig, “May pag-asa ba ako?” Dahil kung walang pag-asa, isinusuko na ang inihaing pag-ibig. Kaya nga, ang hamon sa atin, “Magpakatatag tayo sa ating pag-asa.”

HUWAG NANG MAG-ALINLANGAN PA. Ang kabaligtaran ng pananampalataya ay pag-aalinlangan. Nagiging mahina ang isang Cristiano sa kanyang pananalig kapag pumasok na ang pag-aalinlangan. Mas madaling nahahatak ng mga gawa ng sanlibutan dahil hindi lubos na ibinibigay ang tiwala sa Dioys. Sa halip, pinagdududahan niya ang mga aral na natutuhan mula sa Banal na Kasulatan. Tinanggap na natin ang katotohanang ang Panginoong Jesus ay nag-alay ng buhay sa krus sa ikapapatawad ng ating mga kasalanan. Sumaatin na ang kaligtasan mula nang tayo’y manalig sa Kanya. Ngayon, tayo ay naghihintay sa pangako ng Kanyang muling pagparito. Huwag nang mag-alinlangan pa.

ANG NANGAKO SA ATIN AY MAAASAHAN. Naalaala ko ang isang ilustrasyon, kung sakaling yayain kang sumakay sa isang eroplanong may mga tagpi sa pakpak at may tumutulong langis sa bandang likuran, sasakay ka ba? Syempre, hindi! Hindi ilalagak nang kahit sino ang kanyang kaligtasan sa bagay o tao na hind maasahan. Ang pag-asa ay maaari lamang nating maipagkatiwala sa natitiyak nating maaasahan. At wala nang iba pang mapagtitiwalaan sa buhay na ito kundi ang Makapangyarihang Diyos!

ILAGAK ANG PAG-ASA SA DIYOS. Tandaan natin, wala nang tatatag pa sa buhay na ang tanging  pag-asa ay ang Diyos. Papuri sa Diyos!

Pastor Jhun Lopez

____________________________________

Nakaraang blog: PAGDIRIWANG NG PAGHAHAYAG NG DIYOS

PAGDIRIWANG NG PAGHAHAYAG NG DIYOS

“Bumangon ka, Jerusalem, at sumikat na tulad ng araw. Liliwanagan ka ng kaluwalhatian ni Yahweh… ikaw ay liliwanagan ni Yahweh, at mapupuspos ka ng kanyang kaluwalhatian. Ang mga bansa ay lalapit sa iyong liwanag, ang mga hari ay pupunta sa ningning ng iyong pagsikat.”  ::Isaias 60:1-3

BUMANGON KA. Ang Jerusalem ay pinababangon ng Diyos mula sa pagkalugmok nito sa tuwirang pagtalikod sa Kanya. Sa pagkakataong ito, muli silang ibinabalik sa liwanag ng kaluwalhatian ng Panginoong Diyos. Marahil may mga madilim na bahagi sa taong 2018 ang di na natin nais balikan. Ngunit sa pag-iiwan natin o sa paglimot ng mga ito, nangangailangan ng pagbangon at di manatili sa pagkakadapa. Magliwanag ang buhay natin sa harap ng mga tao sa taong 2019.

MAPUPUSPOS KA. Ang presensiya ng Diyos ay muling mararanasan ng mga Israelita. Ang pangako ng Kanyang kaluwalhatian ang pupuno sa puso at kaluluwa ng bawat isa sa kanila. Ang Iglesia at bawat mananampalataya ay mananagana; sa pisikal lalong higit sa kanilang relasyon sa Diyos. Ang kaluwalhatian ng Diyos, ang Kanyang liwanag ang magsisilbing gabay sa maayos at matuwid na pamumuhay. Dahil sa ganang sarili natin, hindi natin magagawa ang liwanag na Diyos ang Siyang magbibigay.

LALAPIT SA LIWANAG. Napakagandang pangako ng Diyos sa bayang Jerusalem! Lalapit ang mga hari, ang mga bayan, ang mga lalaki at mga babae mula sa malalayong lugar dahil sa liwanag na makikita sa kanila. Ang pamumuhay Cristiano ay hindi lamang para sa ikabubuti ng sarili natin. O kaya’y uri ng paglilingkod sa Diyos. Higit pa rito, ang maging alagad na sumusunod sa Panginoong Jesus ay may layuning mailapit ang mga tao sa Kanya. Ito ang nararapat na nagaganap sa Iglesia at sa buhay ng bawat Cristiano.

IPAGDIWANG ANG PAGHAHAYAG NG DIYOS. Ang taong 2018 ay lumipas na. Naging pagpapala ito sa marami. Ngayong 2019, ang paghahayag ng Diyos sa buhay ng Iglesia at ng bawat isa ay maipagdiwang. Mabiyayang bagong taon sa lahat!

Pastor Jhun Lopez

___________________________

Nakaraang blog: NAGPUPUNYAGI PATUNGO SA HANGGANAN