KUMIKILALA KAY JESU-CRISTO

      Sapagkat kung nakatakas na sa kasamaan ng sanlibutan ang mga taong kumilala kay Jesu-Cristo na Panginoon at Tagapagligtas, ngunit muli silang maakit sa dating masamang gawain at tuluyang mahulog dito, ang magiging kalagayan nila ay masahol pa sa dati.

2 Pedro 2:20

 

Nakatakas na sa kasamaan ng sanlibutan. Ang kumikilala kay Jesu-Cristo ay mga taong kumikilala sa Kanya bilang Panginoon at Tagapagligtas. Siya ay nagsimula nang sumunod sa Panginoong Jesus at tinatanggap ang ginawang pagtubos sa kasalanan sa pamamagitan ng Kanyang kamatayan sa krus. Mula sa araw na tayo ay nakakilala sa Panginoong Jesu-Cristo, tayo ay nakatakas na sa kasamaan ng sanlibutan. Kay Pedro, nakatakas, para kay Pablo, tayo ay malaya na sa kasalanan (Galacia 5). Ang kasamaan na umaalipin sa tao at dahilan ng parusang dulot ng kawalan ng pagkilala sa Diyos ay wala na sa buhay natin.

Kung paaanong si Noe at ang kanyang pamilya ay nakaligtas sa malaking baha (t. 5), tayo ay nakatakas sa malaking baha ng kasamaan ng sanlibutan. Kung paanong si Lot ay nakaligtas sa pagtupok ng Sodoma at Gomora (t. 6), tayo naman ay nakatakas sa parusang dulot ng kasamaan ng sanlibutan. Hindi na tayo alipin ng kasamaan. Lalong hindi na tayo bilanggo nito. Malaya na tayo. Nakatakas na tayo. Hinubad na natin ang dating pagkatao at nagbihis na tayo ng bagong pagkatao (Colosas 3:9-10).

Maaaring muling maakit sa dating masamang gawain. Ang isang taong kumikilala sa Panginoong Jesus ay nakatakas na sa kasamaan subalit maaari pa rin siyang maakit nito. Sinasabi ng Apostol Pedro sa mga mambabasa niya na kahit sila ay malaya na at nakatakas na sa kasamaan, may posibilidad pa rin sila ay maakit sa pagkakasala. Iyon ang realidad! Hindi tayo naging "sin-proof." Nakatakas tayo pero sa ating paglalakbay, ang diyablo na ating kaaway ay laging parang leong umuungal at nag-aabang kung kailan tayo malalapa (1 Pedro 5:8). Ang mga taong walang pagkilala sa Panginoon ay nasa panig na niya. Ang mga taong nagpapahayag ng pananampalataya sa Panginoong Jesus ang kanyang puntirya.

Dahil dito, marapat lamang na tayo ay maging mapagbantay sa kabila ng kabila na tayo ay nakatakas na sa gawa ng masama. Kinilala na natin si Jesus bilang Panginoon, pagsikapan natin ang tapat na pagsunod sa Kanya. Lumago tayo sa pananampalataya sa bawat sandaling pakikipag-ugnay natin sa Kanya. Nang sa gayon, hindi mabigyan ng pagkakataon ang umuungal na leon na tayo ay tuksuhin. Kilalanin pa nating lubos ang ating Tagapagligtas. Maging matibay sa atin ang Kanyang ginawang pagliligtas doon sa krus ng kalbaryo.

Binabalaan sa tuluyang pagkahulog sa masama. "Mas mahahol pa sa dati." Ito ay isang babala sa mga kumikilala kay Jesus na Panginoon at Tagapagligtas. Ang minsang paglimot at maakit ng kasamaan ay maaaring maging patuluyang pagkalubog sa kasamaan. Tamang angkinin ang kaligtasan matapos nating tanggapin ang Panginoong Jesus, pero tamang maunawaan nating pilit pa rin tayong aagawin ng kaaway, sukat magpakasama na ang isang taong dating nag-alay ng buhay sa Diyos. Hindi maaaring ipagmalaki ninuman, "Nakatakas na ako sa kasamaan, hindi na ako mahuhuling muli." Sa babala ng Apostol Pedro, malinaw na may posibilidad na ang isang Cristiano ay mahulog sa bitag ng masama at magpatuloy na sa kasamaan nito. 

Huwag tayong maging katulad ng aso na ang sariling suka ay kinakain o kaya'y tulad ng baboy na matapos paliguan ay nagbabalik sa putikan (t. 22). Mas masahol pa tayo sa dating buhay natin kapag nangyari ito. Kung ano man ang magaganap sa panahong iyon, nawa ay hindi na natin nasaing mangyari pa ito sa atin. Sa halip, sa babalang ito, pagsikapan nating tayo ay hindi tuluyang mahulog sa kasamaan. Nagkakasala man tayo sa pana-panahon, ngunit buong pagpapakumbaba tayong muling lumalapit sa Panginoon at nagsisisi sa nagawang pagkakasala. Kaya nga, higit pa nating kilalanin ang Panginoon at Tagapagligtas na ating kinikilala - ang Panginoong Jesu-Cristo!

                                                                                                  PastorJLo