Alam ko ring matiyaga ka, nagtiis ng maraming hirap alang-alang sa akin at hindi ka sumuko. 4 Subalit may isang bagay na ayaw ko sa iyo: iniwan mo na ang pag-ibig mo noong una.
Pahayag 2:3-4
Alalahanin ang dating kalagayan. Ang Iglesia sa Efeso ay isa sa pitong Iglesia na sinulatan ng Panginoong Jesus sa pamamagitan ng Apostol Juan. Sa lahat ng pakikipag-usap ng Panginoong Jesus, binibigyang-diing nalalaman Niya ang kalagayan ng pitong Iglesiang ito. Kaya naman, ang mga nilalaman nito ay pagkilala sa kanilang magandang kalagayan at sa pagbibigay-babala sa mali nilang pamumuhay. Ang Efeso, ayon sa Panginoong Jesus, ay isang Iglesiang nagpapagal, matiyagang nagtitiis at hindi kinukunsinti ang masama (t. 2). Sila ay Iglesiang nagtiis ng maraming hirap subalit hindi sumuko sa pananampalataya (t. 3).
Maganda ang reputasyon ng mga taga-Efeso. Lamang, isa ang hindi nagustuhan ng Panginoong Jesus sa kanila. Iniwan na nila ang una nilang pag-ibig. Hindi sila sumuko. Nagpapatuloy sila subalit ang kanilang masigasig na pananampalataya ay hindi na katulad nang dati. Napapagod na sila. Nagrereklamo na sila. Kinukunsinti na nila ang masama. Hindi na nila kayang magtiis. Ito ang unang payo ng Panginoong Jesus, "Alalahanin mo ang dati mong kalagayan." Magbalik na sila sa mga panahong nagagawa nilang magtiis at magtiyaga sa kabila ng mga hirap at pagsubok na kanilang nararanasan. Ito rin ang sinasabi ng Panginooong Jesus sa mga mananampalataya sa ating panahon. Sa ating nakararanas ng panghihina sa pananampalataya. Sa ating iniwan na ang unang pag-ibig.
pagsisihan at talikuran ang masasamang gawa. Ang epekto ng nalalayong pakikipag-ugnay sa Panginoong Jesus ay ang pakikiayon sa masama. Ang dating hindi pagkunsinti sa masama ng mga taga-Efeso ay nadungisan dahil sa kanilang pag-iwan sa kanilang unang pag-ibig. Ang dating paninindigan nila sa mabuti at tama ay napalitan ng kanilang paggawa ng masama. Habang tayo ay nalalapit sa Panginoong Jesus, ang Kanyang katuwiran at kabanalan ay sumasakop sa ating pamumuhay. Ang lakad natin ay tulad na ng paglakad ng Panginoong Jesus. Kaya naman, sa pag-iwan sa unang pag-ibig ng mga taga-Efeso, ang gawang masama ay nakapagsok sa Iglesia.
Wala nang iba pang dapat gawin sa gawang masama ay ang pagsisisi. Kailangang mamulat ang mga mata ng mga taga-Efeso, na sila ay nalalayo na sa Panginoong Jesus at ang masasamang gawain ay kanila ng nilalakaran. Ang sulat sa kanila ay malaking pagpapaalala na sa kanilang pagpapatuloy sa pananampalataya, hindi na nila namamalayang naiwanan na pala nila ang kanilang unang pag-ibig. Ito rin ay pagpapaalala sa atin na maaaring tayo ay nasa kalipunan pa rin ng mga kapatiran subalit ang ating personal na pakikipag-ugnay sa Panginoong Jesus ay hindi na nagiging mabunga dahil sa kasalanang humahadlang sa ating relasyon sa Kanya. Ito ang pagkakataong, aminin na ang kasalanan at ihingi ang kapatawaran mula sa Panginoong Jesus.
gawing muli ang mga ginagawa noong una. Iniwan mo na ang pag-ibig mo noong una! Noon, matiyaga sila, nagtitiis sa mga hirap, lumalayo sa masama at may malalim na pag-ibig sa Panginoon. Subalit, isang katotohanan, hindi na sila katulad nang dati. Matapos nilang alalahanin ang dati nilang kalagayan, matapos nilang pagsisihan ang mga gawa nilang masama, ngayon, kailangan na nilang gawing muli ang dati nilang ginagawa. Kailangan nilang ibalik ang dati nilang sigla. Ang pag-ibig sa Panginoong Jesus sa pamamagitan ng pagsasabuhay ng Kanyang mga Salita ay muli nilang isagawa.
Manumbalik sa unang pag-ibig. Maliban pa sa pag-alaala ng mga dati nating mga nagawa, na sa katotohanan ay ginawa natin sa Kanyang kapurihan, muli tayong humakbang tungo sa mas masigla nating kalagayan. Damhin ang presensiya ng Diyos sa ating mga pananalangin. Makipag-ugnay na mabuti sa Panginoong Jesus tuwing tayo ay dumudulog sa ating mga personal devotion. Ang pagkilos ng Banal na Espiritu ay maging hayag sa ating araw-araw na pamumuhay. Mahalin natin ang Diyos nang buong puso, buong isip, buong lakas at buong kaluluwa. Mahalin natin ang ating kapwa ayon sa nais ng Panginoon.
PastorJLo
